Sobre Integra
Quen somos? Nós e a nosa experiencia
Integra comezou a súa andaina en Galicia no ano 2004, mais o seu persoal leva preto de 15 anos traballando nos ámbitos da educación ambiental, conservación da biodiversidade e Axenda 21, en varios países, e en proxectos dos sectores públicos, privados e voluntarios.
Aínda que pioneiro en Galicia, baseamos o noso xeito de traballo na nosa experiencia dentro dalgunhas das organizacións ambientais máis innovadoras e recoñecidas de Europa.
De momento, contamos con dous socios:
- David Brown, de orixe inglés e licenciado en ciencias ambientais. Antes de vir a Galicia no ano 2003, David traballou en ONG ambientais en Inglaterra, País de Gales, Almería e na India. No ano 1999, un proxecto deseñado e coordinado por David foi premiado polo goberno británico como ‘mellor proxecto británico de participación cidadá no medio ambiente’.
- Pili Araújo, redondelá, e con formación en áreas diversas dende forestais ata coordinación cultural. Pili leva dende o 2003 traballando na coordinación do voluntariado e na xestión de proxectos ambientais e culturais.
Contamos tamén do apoio de monitores e técnicos de diversas especialidades segundo o necesario para os proxectos que impartimos, incluídos biólogos e enxeñeiros, delineantes e deseñadores gráficos, ilustradores e artistas, educadores e monitores. Non facemos obras grandes, pero para obras pequenas contamos tamén con capataces e xardineiros, carpinteiros, canteiros e outros obreiros.
